Xorazmda fermerlarning yeri olib qo‘yilayotgani aytildi
Holat yuzasidan prokuratura rasmiy izoh berdi.
Ijtimoiy tarmoqlarda Xorazm viloyati Gurlan tumanida 40 dan ortiq fermer xo‘jaliklarining yer maydonlarini olib qo‘yish bo‘yicha Gurlan tumani prokuraturasi tomonidan sudga daʼvo arizasi kiritilayotgani haqida xabarlar tarqalmoqda.
Aniqlanishicha, ayrim fermer xo‘jaliklariga yer maydoni tanlovga qo‘yish bilan bog‘liq hujjatlar o‘rganilganida, tanlov o‘tkaziladigan sanasi ko‘rsatilgan holda qaror qabul qilinmaganligi, ommaviy axborot vositalarida eʼlon qilinmaganligi hamda qishloq xo‘jaligiga mo‘ljallangan yer uchastkalari tanlov o‘tkazilmasdan qonunga zid ravishda ajratib berilganligi va boshqa qator qonun buzilishi holatlariga yo‘l qo‘yilgan.
Shunga ko‘ra, sholichilik va boshqa yo‘nalishlarda faoliyat yuritib kelayotgan fermer xo‘jaliklariga yer maydoni ajratish bo‘yicha Gurlani tumani hokimining 2019-2021 yilardagi qabul qilingan qarorlarini haqiqiy emas deb topish haqida Urganch tumanlararo maʼmuriy sudiga ariza kiritilgan va hozirda arizalar sudda ko‘rilmoqda.
Bundan tashqari, qayd etilgan holatlar bo‘yicha fermer xo‘jaliklari va MCHJlarga yer maydonlari ajratilishida qonun buzilishi holatlariga yo‘l qo‘yilganligi aniqlanib, mazkur holatlar yuzasidan Gurlan tumani prokuraturasi tomonidan 25.12.2023 yilda tuman hokimligi mansabdor shaxslari va boshqalarga nisbatan JKning 205, 207-moddalari bilan jinoyat ishi qo‘zg‘atilgan hamda hozirda dastlabki tergov harakatlari olib borilmoqda.
