Saida Mirziyoyeva o‘zbekistonliklarni Yangi yil bilan tabrikladi
"Yangi yilning har kuni o‘zaro anglashuv, mehr-muhabbat, hayotimizdagi eng oliy neʼmat - oilaga tayanch bo‘lish naqadar muhimligini eslatib tursin", deyiladi tabrikda.
O‘zbekiston Prezidenti yordamchisi Saida Mirziyoyeva o‘zbekistonliklarni Yangi yil bayrami bilan tabrikladi. Tabrik matni uning rasmiy telegram-kanalida eʼlon qilindi.
"Yangi yil – oila davrasida nishonlanadigan eng muhim bayramlardan biri. Bu ayyom bizga bolalik davrimizni, yangi yil moʻjizasini intizorlik bilan kutganimizni, qor o‘ynaganlarimizni, o‘sha paytlardagi sehrli lahzalarni eslatadi. Biz Qorboboga ishongan, qorxatlar yozgan, bir-birimizga yangi yil omadli kelishini tilagan damlarimiz…
Mening sizlarga tilagim – oilangiz barcha tashvishlardan himoya qiluvchi ishonchli qo‘rg‘oningiz bo‘lsin. Yangi yilning har kuni o‘zaro anglashuv, mehr-muhabbat, hayotimizdagi eng oliy neʼmat - oilaga tayanch bo‘lish naqadar muhimligini eslatib tursin.
Farzandlar kulgisi xonadoningiz fayzi bo‘lsin, o‘ylagan barcha niyatlaringiz esa ro‘yobga chiqsin", deyiladi tabrikda.
