2023 yilgi inflyatsiya darajasi maʼlum qilindi
Dekabrda oziq-ovqatlar 1,3 foizga qimmatladi.
2023 yil yakunlari bo‘yicha 8,77 foizlik inflyatsiya qayd etildi.
Statagentlikning maʼlum qilishicha, dekabrda oylik inflyatsiya 1,24 foizni tashkil etgan, bunda oziq-ovqatlar 1,3 foizga, nooziq-ovqatlar 1,0 foizga, xizmatlar 1,5 foizga qimmatlagan.
Qayd etilishicha, dekabr oyi davomida asosiy oziqlardan shakar 0,8 foizga, guruch 0,4 foizga, tuxum 0,3 foizga, qo‘y go‘shti 0,3 foizga, mol go‘shti 0,2 foizga, yog‘ 0,2 foizga, un 0,1 foizga arzonlagan.
Shuningdek, benzin oy davomida 3,3 foizga, propan 5,1 foizga oshgan bo‘lsa, “metan” narxlarida o‘zgarish bo‘lmagan.
Yillik hisobotda esa bug‘doy uni va kungaboqar yog‘i narxlarida pasayish kuzatilgan bo‘lsa, guruch (38,7 foiz), mol va qo‘y go‘shti (9,3 foiz), tuxum (11,7 foiz) va shakar (11 foiz) qimmatlagan.
