Toshkentda issiq suv isteʼmolchilarga loyqa qora zarralar bilan yetkazib berildi
Holatga shahar hokimiyati munosabat bildirdi.
Toshkentda Ijtimoiy tarmoqlar orqali isteʼmolchilardan issiq suvda loyqalik bilan qora zarralar mavjudligi yuzasidan shikoyatlar kelib tusha boshladi. Bunga shahar hokimligi rasmiy munosabat bildirdi.
Qayd etilishicha, laboratoriya xodimlari tomonidan zudlik bilan 1-IM qozonxonasidan isteʼmolchilarga yetkazib berilayotgan issiq suv tahlili o‘tkazilgan.
Aniqlanishicha, 2024 yil 2 yanvardan 3 yanvarga o‘tar kechasi 1-IM qozonxonasida suvni tozalash filtridan sulfatlangan ko‘mir ajralib chiqqan. «VET» MCHJ XK isitish tarmoqlariga qozonxonadan sulfatlangan ko‘mir tushishi natijasida Mirzo Ulug‘bek va Yashnobod tumanlaridagi isteʼmolchilarning issiq suvlarida qora fraksiyalar (sulfoko‘mir) paydo bo‘lgan. Issiq suv parametrlari, rang va loyqalikdan tashqari, normal holatda.
Sulfoko‘mir suvni filtrlashda ishlatiladi va isteʼmolchilar uchun xavf tug‘dirmaydi. 1-IM qozonxona xodimlari tomonidan issiqlik tarmoqlarida sulfatlangan ko‘mir oqimi bartaraf etilgan. Ayni paytda vaziyat qozonxona va texnik xodimlari tomonidan nazoratga olingan.
