Janubiy Koreyada it go‘shtini yeyish taqiqlandi

 

Qonun loyihasi deyarli bir ovozdan qabul qilindi: 208 nafar deputat uni qo‘llab-quvvatladi, ikki nafari ovoz berishda betaraf qoldi. Endi hujjat prezident Yun Sok Yol tomonidan imzolanishi kerak.

 

Itni o‘ldirgan shaxs uchun uch yil qamoq jazosi va 30 million koreys voni (taxminan 23 ming dollar) miqdorida jarima tayinlanadi, deb xabar bermoqda CNN.

 

Itlarni tanovul qilish uchun ko‘paytirgan yoki bila turib it go‘shtidan tayyorlangan oziq-ovqat mahsulotini sotib olgan, tashigan, saqlagan yoki sotganlar ham jarimaga tortiladi va qamoq jazosiga hukm qilinadi. CNN nashrining aniqlik kiritishicha, qonun loyihasida it go‘shtini isteʼmol qilganlik uchun jazo nazarda tutilmagan.

 

Fermer xo‘jaliklari, restoran egalari va it go‘shti sanoati bilan shug‘ullanadigan boshqa shaxslarga o‘z bizneslarini yopish uchun uch yil vaqt beriladi.

 

Janubiy Koreya rasmiylariga ko‘ra, mamlakatda 1100 ga yaqin it fermasi mavjud bo‘lib, ularda yarim millionga yaqin it boqiladi. Fermerlar qonun loyihasiga norozilik bildirib kelishadi. Ularning hisob-kitoblariga ko‘ra, qonun kuchga kirgach, millionga yaqin odam ishsiz qolishi mumkin.

 

Janubiy koreyaliklar it go‘shtidan bosqichma-bosqich voz kechib kelishmoqda. 2022 yilda Gallup Korea tomonidan o‘tkazilgan so‘rovnomaga ko‘ra, respondentlarning atigi 8 foizi it go‘shtini isteʼmol qilishini bildirgan, 2015 yilda esa bu ko‘rsatkich 27 foizni tashkil qilgan.

 

Maʼlumot o‘rnida: Hukumat statistikasiga ko‘ra, it go‘shtidan tayyorlangan mahsulotlarni sotuvchi 1150 ga yaqin it fermasi, 34 ta go‘shtni qayta ishlash zavodi, 219 ta distribyutor va 1600 ga yaqin restoran mavjud.