Shavkat Mirziyoyev Rossiyadagi avariyada jabrlanganlarni olib kelishni buyurdi
YTHda 7 nafar O‘zbekiston fuqaro halok bo‘lgan.
Favqulodda vaziyatlar vazirligi Rossiya Federatsiyasining Penza viloyatida sodir bo‘lgan yo‘l-transport hodisasi yuzasidan birlamchi maʼlumot eʼlon qildi.
Bugun,11 yanvar kuni Moskva vaqti bilan soat 02:20 larda Penza viloyatining Nijnelomov rayonidagi M-5 avtomobil yo‘lining 503 kilometrida harakatlangan “JAC” rusumli “Miniven” avtomobili va “Volvo” rusumli yuk avtomobili to‘qnashishi oqibatida “JAC” rusumli “Miniven” avtomobili ichida bo‘lgan jami 9 nafar O‘zbekiston Respublikasi fuqarolaridan 7 nafari voqea joyida halok bo‘lgan, 2 nafar yo‘lovchi turli darajada tan jarohati olib, shifoxonaga yotqizilgan va tibbiy muolajalar ko‘rsatilmoqda.
O‘zbekiston Respublikasi Prezidenti Shavkat Miromonovich Mirziyoyevning topshiriqlariga asosan Favqulodda vaziyatlar, Tashqi ishlar, Ichki ishlar, Sog‘liqni saqlash va Transport vazirliklari, Tashqi mehnat migratsiyasi agentligi va boshqa tegishli tashkilotlar bilan hamkorlikda Mudofaa vazirligining maxsus samolyotida, vafot etgan va jabrlangan fuqarolarimizni vatanga olib kelish yuzasidan kerakli barcha zarur chora-tadbirlar ko‘rilmoqda.
Taʼkidlanishicha, Rossiya Federatsiyasi masʼullari yuzaga kelgan mazkur baxtsiz hodisa oqibatlarini zudlik bilan bartaraf etish, jarohatlanganlarga tez tibbiy yordam ko‘rsatishda yaqindan ko‘mak berishmoqda.
