Toshkentda 2010-yilgacha ishlab chiqarilgan avtomobillarni haydash taqiqlanishi mumkin
Ekologik vaziyatni yaxshilash maqsadida poytaxtda avtomobillar uchun bir qator cheklovlar joriy etish taklif etildi.
O‘zbekiston Ekologiya vazirligi maʼlumotlariga ko‘ra, Toshkent shahridagi havo ifloslanishiga daraxtlarning noqonuniy kesilishi, transport vositalaridan chiqadigan zararli gazlar, ko‘mir va mazut tutuni sabab bo‘lmoqda.
“Yirik shaharlar, jumladan, Toshkent shahrida atmosfera havosining ifloslanishi elektr va issiqlik energiyasi manbalari, avtomobillar chiqindilari hajmining oshishi bilan bog‘liq. Ularning salbiy taʼsirini kamaytirish uchun tegishli chora-tadbirlar ishlab chiqish zarur”, – deyiladi vazirlik maʼlumotida.
Shu munosabat bilan vakolatli organ Toshkent shahrida quyidagi cheklash choralarini joriy etishni taklif qiladi:
-
- “Yevro-4” standartiga to‘g‘ri kelmaydigan yoqilg‘idan foydalanishni taqiqlash (AI-80 markali yoqilg‘i);
-
- yuk mashinalarining harakatini cheklash (soat 07:00 dan 10:00 gacha va 17:00 dan 20:00 gacha);
-
- 2010 yilgacha ishlab chiqarilgan barcha transport vositalarining harakatlanishini taqiqlash. Elektromobillarga o‘tgan avtomobil egalariga chegirmalar, preferensiyalar va subsidiyalar berish;
-
- avtomobil yo‘llarida tirbandlikni kamaytirish va harakatni optimallashtirish amaliyoti sifatida “toq va juft” kunlarda transport vositalarini boshqarish qoidalarini joriy etish;
-
-shaharning markaziy ko‘chalarida avtomashinalarsiz zonalar tashkil etish;
- - jamoat transportini muqobil yoqilg‘i turlariga, yaʼni elektr va gazga o‘zgartirish, tegishli infratuzilmani yaratish.
Shuningdek, korxonalar va issiqlik markazlarida ko‘mir va mazutdan foydalanishni taqiqlash tavsiya etiladi. Departament barcha turdagi obyektlarni (ijtimoiy va davlat ahamiyatiga molik obyektlar bundan mustasno) qurishga moratoriy eʼlon qilish, Toshkent shahri atrofida sunʼiy suv havzalari va yashil hudud yaratish, shuningdek, havo sifati ko‘rsatkichlarini o‘rnatish maqsadga muvofiq, deb hisoblaydi.
