Farg‘onadagi “Yoshlar ko‘li” saqlab qolindi
U hokim buyrug‘i bilan firmaga berib yuborilgani aytilgandi.
Farg‘ona shahri markazidagi 2 gektarlik ko‘l hokim Xayrullo Bozorovning qarori bilan 24 kunlik firmaga berib yuborilgani keng jamoatchilik muhokamalariga sabab bo‘ldi.
Rasmiy xabarga ko‘ra, Farg‘ona viloyati hokimining 2024 yil 29 yanvardagi tegishli qaroriga asosan Farg‘ona shahar “Oybek” MFY hududida joylashgan sobiq “Yoshlar ko‘li” bino-inshootlari “Unays building” MCHJga investitsiyaviy va ijtimoiy loyihalarni amalga oshirish uchun foydalanish huquqi bilan berilgan, yaʼni sotilmagan.
Mazkur masalaga aniqlik kiritish bo‘yicha o‘rganishlarda ushbu obyekt Sport vazirligi tomonidan samarali foydalanish uchun Farg‘ona shahar hokimligi balansiga viloyat hokimining 2022 yil 30 dekabrdagi qaroriga asosan o‘tkazib berilganligi, biroq hokimlik tomonidan obyektga nisbatan kadastr hujjatlari rasmiylashtirilmaganligi aniqlangan.
Аytilishicha, ushbu holatda, “Davlat mulkini boshqarish to‘g‘risida”gi O‘zbekiston Respublikasi Qonuni bilan belgilangan tartib talablari bajarilmagan.
Qonun talablariga ko‘ra, davlat ko‘chmas mulk obyektlarini, idoraviy mansubligidan qatʼi nazar, operativ boshqaruv huquqi asosida bir davlat muassasasi yoki davlat unitar korxonasidan boshqa davlat muassasasi yoki davlat unitar korxonasiga o‘tkazish to‘g‘risida qaror Davaktiv agentligi tomonidan tegishli davlat organlari bilan kelishuvga ko‘ra qabul qilinishi belgilangan.
Shunga ko‘ra, amaldagi qonunchilik bilan belgilangan tartiblar buzilganligi munosabati bilan Davaktiv agentligi tomonidan Sport vazirligiga obyektni Sport maktabi balansiga qaytarib olish, hokimni “Unays building” MCHJga foydalanishga berish to‘g‘risidagi qarorni bekor qilish bo‘yicha joriy yil 6 mart kuni tegishli ko‘rsatmalar yuborilgan.
