“Istalgan paytda yangi pandemiya boshlanishi mumkin”
JSST rahbari Tedros Gebreyesus ogohlantirish bilan chiqdi.
Bundan salkam 3 oy avval Jahon sog‘liqni saqlash tashkiloti dunyo bo‘ylab parranda grippi deb ataluvchi H5N1 virusi keng tarqala boshlagani haqida bayonot bilan chiqqandi.
Bunga aprel oyida AQSHda ushbu kasallik insonlarga ham yuqishi bilan bog‘liq ilk holat aniqlangani, ko‘p o‘tmay Meksikada insonlar o‘rtasida infeksiyaning yangi — H5N2 shtammidan birinchi o‘lim qayd etilgani sabab bo‘ldi.
Kuzatuvlarga ko‘ra, ilgari faqat parrandalar nobud bo‘lishiga olib kelgan bu xastalik mutatsiyaga uchrashda davom etyapti. Oqibatda undan sutemizuvchilar turkumiga mansub baʼzi jonzotlar, masalan, qoramollar ham zarar ko‘ryapti.
Endi xastalik odamlar hayoti va sog‘ligiga xavf tug‘dira boshlagani esa mutaxassislarni jiddiy tashvishga solmoqda. O‘tgan yili Kabodjada qayd etilgan o‘lim holatlari boshqa mintaqalarda ham yangi shtamm oqibatida kuzatilishi buning uchun yetarli asos.
JSST rahbari Tedros Gebreyesus Jenevada bo‘lib o‘tgan Hukumatlararo muzokaralar organi yig‘ilishida shu haqda to‘xtalib, dunyoda istalgan vaqtda yangi pandemiya boshlanishi mumkinligidan ogohlantirdi.
Buni izohlash uchun parranda grippi epidemiyasining kutilmaganda avj olishini eslatib o‘tdi. O‘z navbatida, barcha hukumatlarni mazkur virus ustidan nazoratni kuchaytirishga chaqirdi.
