Fransiyada o‘quvchilar namoyishi: 164 kishi hibsga olindi

Fransiyaning turli hududlarida, xususan, Il-de-Frans mintaqasida yuqori sinf o‘quvchilari ta’lim muassasalaridagi resurslar va o‘qituvchilar yetishmasligiga qarshi norozilik namoyishlari o‘tkazdi. Namoyishlar vaqtida 164 kishi hibsga olingan.

 

Fransiya ichki ishlar vaziri Loran Nunesning ma’lum qilishicha, namoyishlar davomida 12 nafar yuqori sinf o‘quvchisi, uch nafar maktab direktori, ta’lim muassasalarining besh nafar xodimi hamda 12 nafar ichki xavfsizlik kuchlari xodimi jarohatlangan.

 

Nunesning so‘zlariga ko‘ra, 28-sentyabr kuni mamlakat bo‘ylab norozilik aksiyalari qariyb 180 ta maktabni qamrab olgan. Ulardan 27 tasi to‘liq bloklangan. Ayrim joylarda namoyishchilar va politsiya o‘rtasida to‘qnashuvlar yuz bergan.

 

BFMTV telekanali xabariga ko‘ra, noroziliklar 29-sentyabr kuni ham davom etgan. Parijda yuqori sinf o‘quvchilari ta’lim muassasalaridagi murakkab vaziyatga e’tibor qaratish maqsadida namoyish o‘tkazgan.

 

Lill shahrida esa vaziyat keskinlashgan. Bir guruh namoyishchilar Sezar Bajio nomidagi maktabga kuch bilan kirishga uringan. Shundan so‘ng voqea joyiga huquq-tartibot xodimlari yuborilgan. 

 

Namoyishchilarning bir qismi politsiyaga tosh va boshqa buyumlarni uloqtirgan, shundan keyin huquq-tartibot kuchlari ularni tarqatishga kirishgan.

 

Norozilik aksiyalariga universitet talabalari ham qo‘shila boshlagan. BFMTV ma’lumotiga ko‘ra, Lill yaqinidagi Vilnev-d’Ask shahrida joylashgan Pon-de-Bua kampusi talabalar tomonidan bloklangan.

 

Tuluza shahridagi Pol Sabatye universitetida ham talabalar o‘z talablarini ilgari surib, norozilik aksiyasi o‘tkazgan.