Ohangaronda 35 mingta “paqildoq” ushlab qolindi
Hozirda holat yuzasidan bojxona tekshiruvi o‘tkazilmoqda.
“Toshkent-AERO” IBK tezkor tuzilmalari avtomashinada yashirilgan pirotexnika vositalari hamda “iPhone” telefonlarining ichki hududdagi noqonuniy aylanmasiga chek qo‘yishdi.
Toshkent viloyatining Ohangaron tumanida o‘tkazilgan tezkor tadbirda oldindan olingan tezkor maʼlumotlarga asosan, “Vodiy-Toshkent” yo‘nalishi bo‘yicha harakatlangan “Cobalt” rusumli avtotransport vositasi belgilangan tartibda to‘xtatildi.
Avtomashina ko‘zdan kechirilganda esa uning ichida xorijda ishlab chiqarilgan, 2 turdagi jami 35 562 dona pirotexnika vositalari hamda 15 dona “iPhone” rusumli uyali aloqa vositalari borligi aniqlanib, vaqtincha saqlovga olindi.
Ashyoviy dalil sifatida olingan mazkur pirotexnika vositalari hamda smartfonlarning dastlabki taxminiy qiymati 160 mln so‘mni tashkil qilmoqda. Hozirda holat yuzasidan bojxona tekshiruvlari olib borilmoqda.
