616 mln so‘mlik mukofot: “Yil o‘qituvchisi” g‘oliblari aniqlandi
Tanlovda 46 mingdan ortiq pedagog ishtirok etdi. G‘oliblar uch bosqichda saralandi.
2026-yilda ilk bor o‘tkazilgan “Yil o‘qituvchisi” tanlovining g‘oliblari ma’lum bo‘ldi. Tanlovda respublika bo‘yicha 46 ming nafardan ortiq pedagog ishtirok etdi.
Tanlov yakunlariga ko‘ra, 208 ta tuman va shahardan birinchi o‘rinni egallagan 208 nafar pedagog g‘oliblikni qo‘lga kiritdi. Ularning har biriga 616 mln so‘mdan, ya’ni bazaviy hisoblash miqdorining 1 400 baravari miqdorida pul mukofoti beriladi.
Ma’lum qilinishicha, tanlov pedagoglarning kasbiy mahoratini oshirish va ta’lim sifatini yuksaltirishni rag‘batlantirish maqsadida tashkil etilgan. Tanlov Prezident tashabbusi bilan joriy etilgan.
“Yil o‘qituvchisi” tanlovi 2026-yildan boshlab har ikki yilda bir marta o‘tkaziladi. Unda nomzodlar o‘zlari dars beradigan bitta fan bo‘yicha, boshlang‘ich sinf o‘qituvchilari esa boshlang‘ich ta’lim yo‘nalishida ishtirok etadi. Ro‘yxatdan o‘tish vazirlikning maxsus platformasi orqali amalga oshiriladi.
Tanlov uch bosqichda o‘tkaziladi. Birinchi bosqichda nomzodlarning mutaxassislik fani, pedagogik mahorati va kasb standarti bo‘yicha nazariy bilimlari baholanadi.
Ikkinchi bosqichda pedagogik mahorat hakamlar hay’ati hamda pedagoglar tomonidan belgilangan mezonlar asosida baholanadi. Bunda nomzod o‘tgan darsning videoyozuvi maxsus platformaga joylashtiriladi.
Uchinchi bosqichda esa nomzodlarning ma’naviy-ma’rifiy faoliyati va kitobxonlik darajasi baholanadi.
