Toshkent osmonida yorqin obyekt kuzatildi: mutaxassislar dastlabki xulosani berdi
Toshkent osmonida kuzatilgan yorqin obyekt meteor yoki bolid emasligi aytildi. Hodisa Xitoydan uchirilgan raketa bilan bog‘liq bo‘lishi mumkin.
19-sentyabr kuni kechqurun Toshkent osmonida ortidan uzun iz qoldirib harakatlangan juda yorqin obyekt kuzatildi. Hodisa shahar aholisi tomonidan foto va videolarga qayd etildi.
Fanlar akademiyasi Mirzo Ulug‘bek nomidagi Astronomiya instituti mutaxassislari tarqalgan foto va videomateriallarni dastlabki tahlildan o‘tkazdi. Institut katta ilmiy xodimi Kamoliddin Ergashevga ko‘ra, obyektning tashqi ko‘rinishi, harakat xususiyati va hosil qilgan izi meteor yoki bolidga xos emas.
Mutaxassislarning dastlabki baholashicha, kuzatilgan hodisa raketa yoki uning yuqori bosqichi bilan bog‘liq bo‘lishi mumkin.
Qayd etilishicha, hodisa 19-sentyabr kuni Xitoyning Taiyuan kosmodromidan uchirilgan Long March-2D (Chang Zheng-2D) tashuvchi raketasi parvozi bilan mos kelmoqda. Mazkur raketa PIESAT-2 turkumidagi to‘rtta sun’iy yo‘ldoshni orbitaga olib chiqqan.
Dastlabki orbital hisob-kitoblarga ko‘ra, raketaning uchirilish vaqti, orbitasi, shuningdek, Toshkent osmonida obyekt kuzatilgan vaqt va yo‘nalish o‘rtasida moslik mavjud.
Shu bois hozircha eng ehtimoli yuqori taxmin — Toshkent osmonida kuzatilgan hodisa ushbu kosmik uchirishning raketa bosqichi yoki undan keyingi orbital jarayonlardan biri bilan bog‘liq.
Biroq mutaxassislar obyektni aynan Long March-2D raketasining muayyan qismi deb qat’iy identifikatsiya qilishga hali erta ekanini ta’kidlamoqda. Yangi uchirilgan obyektlar bo‘yicha xalqaro orbital kataloglarda zarur elementlar va hodisaga oid mustaqil identifikatsiya hozircha mavjud emas.
Astronomiya institutining dastlabki xulosasiga ko‘ra, Toshkent osmonida kuzatilgan yorqin hodisa meteor yoki bolidga xos emas.
