17 yoshli o‘quvchi gashish bilan ushlandi: jo‘natma Rossiyadan yuborilgan
Giyohvandlik vositalari konserva qutisiga yashirilgan bo‘lgan.
Toshkent viloyatining Chirchiq shahrida Rossiyadan yuborilgan jo‘natmani qabul qilib olayotgan 17 yoshli maktab o‘quvchisi 852,2 gramm gashish bilan ushlandi.
Bojxona qo‘mitasi Kontrabandaga qarshi kurashish boshqarmasi DXX va IIVning tezkor tuzilmalari bilan hamkorlikda «xalqaro nazorat ostida yetkazib berish» tezkor tadbirini o‘tkazgan.
Tadbir davomida 2009-yilda tug‘ilgan voyaga yetmagan shaxs Rossiyadan yuborilgan jo‘natmani qabul qilib olayotgan vaqtda qo‘lga olingan.
Jo‘natma xolislar ishtirokida tekshirilganda, to‘rtta konserva qutisi ichiga 852,2 gramm gashish yashirilgani aniqlangan.
Shuningdek, o‘smirning yashash xonadoni ko‘zdan kechirilganda elektron tarozilar, giyohvandlik vositalarini qadoqlashga mo‘ljallangan «zip» paketlar va izolyatsion lentalar topilgan. Ular ashyoviy dalil sifatida olib qo‘yilgan.
Bojxona qo‘mitasi ma’lumotiga ko‘ra, aniqlangan 852,2 gramm gashish o‘rtacha hisobda 60 ming dozadan ortiqni tashkil etadi. Uning qora bozordagi qiymati qariyb 600 ming dollar deb baholangan.
Holat yuzasidan Bojxona qo‘mitasi tomonidan jinoyat ishi qo‘zg‘atilgan. Hozirda tergovga qadar va tergov harakatlari olib borilmoqda.
