Angrenda bemor “probasiz” ukol ortidan komaga tushdimi? Holat yuzasidan tekshiruv boshlandi
Tekshiruv yakunlari asosida holatga huquqiy va tibbiy jihatdan baho berilishi ma’lum qilindi.
Angrendagi xususiy klinikada 20 yoshli yigit tibbiy yordam ko‘rsatilganidan so‘ng ahvoli og'irlashgani haqidagi xabarlar yuzasidan tekshiruv boshlandi. Bu haqda Toshkent viloyati sog‘liqni saqlash boshqarmasi xabar berdi.
Tarqalgan xabarlarga ko‘ra, bemor shamollash belgilari bilan shu yilning 31 iyul kuni Angren shahridagi “Angren medical center” xususiy klinikasiga murojaat bilan borgan hamda klinikada “proba”siz tomiriga tomchi dori yuborilishi ortidan sog‘ligi yomonlashib hushini yo‘qotgan. Ayni damda bemor Angren shahar markaziy shifoxonasining reanimatsiya bo‘limida ekani aytilmoqda.
Toshkent viloyati sog‘liqni saqlash boshqarmasi qayd etishicha, hodisani har tomonlama va xolis o‘rganish maqsadida ishchi guruh tuzilib, xizmat tekshiruvi tayinlandi.
Tekshiruv davomida bemorga ko‘rsatilgan tibbiy yordam sifati, davolash jarayoni hamda holatning kelib chiqish sabablari tegishli mutaxassislar ishtirokida o‘rganiladi.
Tekshiruv yakunlari asosida holatga huquqiy va tibbiy jihatdan baho beriladi. Qo‘shimcha ma’lumotlar taqdim etilishi aytilgan.
