Dorilarsiz qon bosimini pasaytirish usuli aniqlandi
Choy, shokolad, olma – yurak salomatligi uchun tabiiy dorilar hisoblanadi.
Surrey universiteti olimlari tomonidan olib borilgan tadqiqot natijalari shuni ko‘rsatdiki, choy, qora shokolad, olma va uzum kabi mahsulotlarni muntazam iste’mol qilish qon bosimini pasaytirishga yordam berishi mumkin.
Tadqiqotchilarning aniqlashicha, bu ijobiy ta’sir ushbu mahsulotlar tarkibidagi flavan-3-ollar deb ataluvchi tabiiy birikmalar bilan bog‘liq. Kakao, choy, mevalar va rezavorlar tarkibida mavjud bo‘lgan bu modda yurak-qon tomir salomatligiga sezilarli ijobiy ta’sir ko‘rsatadi.
145 ta randomizatsiyalangan tadqiqotlar tahliliga ko‘ra, flavan-3-ollar, ayniqsa, yuqori qon bosimiga ega odamlarda bosimni pasaytirishda muhim rol o‘ynaydi. Ayrim holatlarda bu ta’sir hatto dori vositalari bilan teng darajada samarali bo‘lgani kuzatilgan.
Tadqiqot davomida flavan-3-ollar tomirlar ichki qatlamining (endoteliy) funksiyasini ham yaxshilashi aniqlangan. Bu esa ularning salomatlikka bosimdan mustaqil ravishda ham foydali ta’sir ko‘rsatishini anglatadi.
Olimlarning ta’kidlashicha, bu modda dori vositalarining o‘rnini bosa olmaydi, biroq muvozanatli parhezning bir qismi sifatida flavan-3-ollarni o‘rtacha miqdorda iste’mol qilish yurak salomatligini saqlashda muhim qo‘shimcha chora bo‘lishi mumkin.
