Toshkentda fastfud sabab 10 oylik chaqaloq operatsiya qilindi
Jarrohlik amaliyotida uning chirigan ichagi kesib tashlangan.
Qayd etilishicha, olis viloyatdan Toshkent shahriga kelayotgan ona yo‘ldan tushlik uchun lavash va qovurilgan kartoshka sotib olgan. Yig‘lab, xarxasha qilgani uchun ayol o‘ziga olgan fastfudni og‘zida chaynab, 10 oylik chaqalog‘iga ham yedirgan. Oradan ma’lum vaqt o‘tib, go‘dakning ahvoli og‘irlashgan.
Shifokorning bildirishicha, chaqaloqda ko‘p marotaba qayt qilish, ichidan qon ketish, qorni dam bo‘lishi va doimiy og‘riqlar kuzatilib kelgan. Ichak chirishi sababli endilikda bir nechta operatsiya bajarilishi kerak. Birinchi bosqichda ichakning chirigan qismi olib tashlangan va ichak stomasi chiqarib qo‘yilgan. Bu stoma bilan chaqaloq 6 oycha yashab turadi, keyin yana operatsiya qilinadi va ichak tiklanadi.
