“So‘nggi qo‘ng‘iroq” tadbirlarida xavfsizlik taʼminlanadi

Ertaga, 2025 yil 24 may kuni maktablarda joriy o‘quv yili yakuniga yetadi. Shu munosabat bilan taʼlim muassasalarida “So‘nggi qo‘ng‘iroq” tadbirlari bo‘lib o‘tadi.

 

Maʼlum qilinishicha, shu yilning 24 may kuni soat 08.00 dan 10.00 ga qadar “So‘nggi qo‘ng‘iroq” bayram tadbirlari respublikamizda faoliyat olib borayotgan 10 mingdan ortiq muassasada maktab o‘quvchilari, ota-onalar hamda jamoatchilik vakillari ishtirokida keng nishonlanishi belgilangan.

 

Ushbu taʼlim muassasalarida 1-sinf, 9-sinf, 11-sinf bo‘lgan jami 2 milliondan ortiq bitiruvchi ishtirok etishi kutilmoqda.

 

Respublika hududida o‘tkaziladigan tadbirlarda xavfsizlikni taʼminlashga jami 27 mingdan ortiq Ichki ishlar vazirligi, Milliy gvardiya, Favqulodda vaziyatlar vazirligi xodimlari va harbiy xizmatchilari biriktirildi.

 

Tadbir o‘tkaziladigan taʼlim muassasalari tegishli mutasaddi idoralar xodimlari tomonidan to‘liq tekshiruvdan o‘tkazilib, qo‘riqlash pultiga ulangan. Videokuzatuv kameralari esa hududiy ichki ishlar organlarining situatsion markazlariga integratsiya qilingan.

 

Bundan tashqari, maktablarda o‘quv yili yakunlanishi munosabati bilan yoshlarimiz xiyobonlar va istirohat bog‘lariga hordiq chiqarish uchun kelishlari kutilmoqda. Ushbu joylarda xavfsizlikni taʼminlashga jami 5 mingdan ortiq huquqni muhofaza qiluvchi organlar xodimlari va harbiy xizmatchilar xizmatga biriktirildi.

 

Hududlardagi bevosita yo‘l chetida joylashgan maktablar oldida harakat xavfsizligini taʼminlash maqsadida yo‘l-patrul xizmati inspektorlari kuchaytirilgan tartibda xizmat olib boradi. Maktablarning joylashgan joyiga qarab transport vositalarining harakati vaqtinchalik cheklanadi. Shu kuni imkon qadar barchaga jamoat transportida harakatlanishlari tavsiya etiladi.