“Biri Quyosh, biri Oy”: “Katta” odamlarning oddiy ota-onalari

Bojxona qo‘mitasi, O‘zbekiston Badiiy akademiyasi va Toshkent fotosuratlar uyi hamkorligida mamlakatimizda ilk bor “Biri Quyosh, biri Oy” nomli eksklyuziv fotoko‘rgazma tashkil etildi. Mazkur ko‘rgazma bojxona xizmati tarixida ilk bor o‘tkazilgani bilan ahamiyatli bo‘lib, o‘zining o‘ziga xos taʼsirchanligi bilan tomoshabinlarni jalb etmoqda. Unda yurtimiz hududlarida xizmat qilayotgan bojxona xodimlarining ota-onalari aks etgan 100 dan ortiq fotosuratlar namoyish qilinmoqda.

 

 

 

 

 

 

 

Ko‘rgazma, ayni paytda, davlatimiz rahbarining 2024 yil 25 martdagi PQ-122-sonli qarori ijrosi doirasida tashkil etildi. Bu qarorda bojxona xodimlarini har tomonlama qo‘llab-quvvatlash, xususan, maʼnaviy jihatdan rag‘batlantirish muhim vazifalardan biri sifatida belgilangan. Fotosuratlarda faqat yuz va qiyofa emas, balki har bir insonning ruhiyati, hayot tajribasi, mehnatga sadoqati va farzand tarbiyasidagi sabr-toqati muhrlangan.

 

 

 

 

 

 

 

Tomoshabinlar suratlar orqali bojxonachi farzandlarining ortida turgan samimiy, mehnatkash va fidoiy ota-onalar bilan xayolan yuzma-yuz kelishadi. Ko‘rgazma jamoatchilikka ko‘p ham ko‘rinish bermaydigan bojxona xodimlarining shaxsiy hayotiga insoniy nazar tashlash imkonini beradi. Shuningdek, ularning ota-onalari – dehqon, bog‘bon, shifokor, o‘qituvchi, hunarmand, sanʼatkor, harbiy va boshqa kasb egalari — jamiyatga beqiyos hissa qo‘shib kelayotgan insonlardir.

 

 

 

 

 

 

 

Ko‘rgazmaning ochilish marosimida Bojxona qo‘mitasi Raisi o‘rinbosari Otabek Choriyev, fotorassomlar uyushmasi raisi Rustam Sharipov va O‘zbekiston xalq artisti Zuhra Ashurova ishtirok etdi. Aktrisa Zuhra Ashurova tomonidan ota-onani ulug‘lashga bag‘ishlangan taʼsirli monologlar ijro etildi. Bu lahzalar mehr va ehtirom bilan to‘lgan onlarga boy bo‘ldi.

 

 

 

 

 

 

 

 

Ko‘rgazmada namoyish etilayotgan fotosuratlar Bojxona qo‘mitasi matbuot xizmati hududiy havaskor tasvirchilari tomonidan tasvirga olingan. Tadbirning “27 iyun — Matbuot va ommaviy axborot vositalari xodimlari kuni” arafasida o‘tkazilishi ham uning maʼnaviy yukini yana-da oshirdi. Shu kuni malaka oshirish uchun poytaxtga jamlangan bojxona organlarining matbuot xizmatlari xodimlariga faol xizmatlari uchun esdalik diplomlari topshirildi.