Toshkentdagi to‘yxonada katta yong‘in chiqdi
Odamlar to‘yxonadan evakuatsiya qilindi, yong‘inni o‘chirish ishlari olib borilmoqda.
Bugun, 28-iyun kuni soat 21:29 da Toshkent shahar Favqulodda vaziyatlar boshqarmasiga Sergeli tumani, Mehrigiyo ko‘chasida joylashgan “Meros” to‘yxonasida yong‘in sodir bo‘layotgani haqida xabar kelib tushdi.
Voqea joyiga zudlik bilan yong‘in-qutqaruv brigadalari yuborilib, soat 21:37 da manzilga yetib borildi. Hozirda yong‘inni bartaraf etish ishlari olib borilmoqda.
Dastlabki ma’lumotlarga ko‘ra, to‘yxonadagi barcha fuqarolar o‘z vaqtida evakuatsiya qilingan. Yong‘in natijasida hech kim jabrlanmagan.
Hozirgi paytda holat to‘liq Toshkent shahar Favqulodda vaziyatlar boshqarmasi nazoratida. Qo‘shimcha ma’lumotlar yuzasidan tegishli tashkilotlar tomonidan aniqlashtirish ishlari davom ettirilmoqda.
