Ukraina Xavfsizlik xizmati polkovnigi o‘ldirib ketildi
Jinoyatchi unga besh marta o‘q uzgan va qochib ketgan.
Bugun, 10 iyul tongida Kiyevning Goloseyev tumanida Ukraina Xavfsizlik xizmati (SBU) polkovnigi o‘ldirildi. Bu haqida “RBK-Ukraina” nashri yozmoqda.
Kiyev politsiya boshqarmasi Goloseyev tumanida o‘q otuvchi quroldan jarohatlanish bilan erkak kishining jasadi topilganini tasdiqladi, biroq boshqa tafsilotlarni ochiqlamadi.
“SBU va Milliy politsiya jinoyatning barcha holatlarini aniqlash va aybdorlarni javobgarlikka tortish uchun kompleks choralarni ko‘rmoqda”, – deyiladi SBU bayonotida.
Ukraina Oliy Radasining sobiq deputati Igor Mosiychukning maʼlum qilishicha, o‘ldirilgan shaxs – SBU polkovnigi Ivan Voronich bo‘lib, u Maxsus operatsiyalar markazining 16-boshqarmasi 1-bo‘limida katta operativ xodim bo‘lib ishlagan.
Mosiychukning so‘zlariga ko‘ra, jinoyatchi Voronichga besh marta o‘q uzgan va voqea joyidan qochib ketgan. Voronich olgan jarohatlaridan voqea joyida halok bo‘lgan.
