“O‘rikzor” savdo kompleksi buzilishi haqidagi gaplarga nuqta qo'yildi
Toshkent shahar hokimligi xabarlar bo'yicha rasmiy bayonot berdi.
So‘nggi kunlarda ijtimoiy tarmoqlarda Toshkentdagi mashhur “O‘rikzor” savdo kompleksi yopiladi yoki buziladi degan xabarlar tarqaldi. Ammo Toshkent shahar hokimligi bu ma’lumotlarga rasmiy munosabat bildirib, bunday gap-so‘zlarga nuqta qo‘ydi.
Hokimlikning rasmiy bayonotida aytilishicha, “O‘rikzor savdo kompleksi” MCHJ tugatilishi, buzilishi yoki qayta qurilishi rejalashtirilmagan. Majmua o‘zining odatdagi ish tartibida haftaning barcha kunlari, dam olishlarsiz faoliyatini davom ettiradi.
Hozircha savdo hududida hech qanday rekonstruksiya yoki yopilish ishlari rejalashtirilmagan. Shu sababli hokimlik fuqarolardan asossiz mish-mishlarga ishonmaslikni so‘ragan.
Savdo majmuasi rahbariyati ham “O‘rikzor” bozori odatdagidek ishlashda davom etayotganini tasdiqlagan.
