Rossiyada O‘zbekiston fuqarosi qurt olib kirgani uchun jarimaga tortildi
Olib kirilgan 2 kilogramm qurt potensial xavfli deb topilgan.
Rossiyaning Perm viloyatida Rosselxoznadzor xodimlari tomonidan O‘zbekistondan kelgan fuqaroning qo‘l yukida sanoat qadog'isiz va belgilarsiz taxminan 2 kilogramm qurt aniqlanib, musodara qilindi. Bu haqda Podrobno.uz nashri xabar qilgan.
Mahsulotda ishlab chiqaruvchi korxonaning nomi, ishlab chiqarilgan sanasi, yaroqlilik muddati va saqlash shartlari ko‘rsatilmagan. Shu sababli qurt “potensial xavfli mahsulot” deb topilib, belgilangan tartibda yo‘q qilingan.
Mazkur holat Rossiya Federatsiyasining “Veterinariya to‘g‘risida”gi qonuni va boshqa tegishli qoidalarga zid bo‘lgani uchun, O‘zbekiston fuqarosiga nisbatan ma’muriy jarima qo‘llanilgan.
Rosselxoznadzorning qo‘shimcha ma’lumotiga ko‘ra, 2025-yil boshidan buyon O‘zbekistondan noqonuniy olib kirilgan 175 kilogramm chorvachilik mahsulotlari aniqlanib, yo‘q qilingan. Bular orasida 50 kg dan ortiq go‘sht, 90 kg dan ortiq sut mahsulotlari va 30 kg asal bor.
Rossiya rasmiylari fuqarolarni mamlakatga chorvachilik mahsulotlarini olib kirishda amaldagi veterinariya talablariga qat’iy amal qilishga chaqirmoqda.
