Chilonzorning 18–19-kvartallaridagi “dom”lar hayot uchun xavfli holatda
Holat bo‘yicha senator tuman hokimiga so‘rov yubordi.
Oliy Majlis Senatining Yoshlar, xotin-qizlar, madaniyat va sport masalalari qo‘mitasi Toshkent shahar Chilonzor tumanida aholi yashash sharoitlari va ko‘p kvartirali uylarga ko‘rsatilayotgan xizmatlar holatini o‘rgandi.
Xususan, tumanning 18 va 19-mavzelarida joylashgan uylarga xizmat ko‘rsatayotgan “GRAND GREAT SILK ROAD SERVICE” MCHJ boshqaruv kompaniyasi faoliyati tahlil qilindi. Tahlillarda aniqlanishicha, kompaniya barcha mulkdorlar bilan belgilangan tartibda boshqaruv shartnomasi imzolamagan. Bu holat “Ko‘p kvartirali uylarni boshqarish to‘g‘risida”gi Qonunning 28-moddasiga zid.
Shuningdek, kompaniya o‘zining moliyaviy va xo‘jalik faoliyati yuzasidan mulkdorlarga hisobot bermagan, umumiy yig‘ilishlar o‘tkazilmagan. Aholi tomonidan bildirilgan e’tirozlarga sabab bo‘layotgan asosiy muammolar qatoriga quyidagilar kiradi:
podyezdlar avariya holatida;
yog‘och romlar va singan oynalar almashtirilmagan;
kanalizatsiya tizimi nosoz, elektr tarmoqlari xavfsizlik talablariga javob bermaydi;
favqulodda holatlarda mutaxassislarni aholining o‘zi yollashga majbur bo‘lmoqda;
bolalar maydonchalari va sport inshootlari mavjud emas.
2022-yil 29-oktabrda o‘tkazilgan yig‘ilishda ham ushbu kamchiliklar ta’kidlangan bo‘lsa-da, amaliy choralar hanuzgacha ko‘rilmagan.
Mazkur holat yuzasidan Senat qo‘mitasi raisi Orzigul Kozixonova tomonidan Chilonzor tumani hokimi Saidqaxxor Xolxo‘jayev nomiga senator so‘rovi yuborildi. So‘rovda boshqaruv kompaniyasi faoliyatini samarali tashkil etish bo‘yicha ko‘rilayotgan chora-tadbirlar yuzasidan asoslantirilgan izoh berish so‘ralgan.
