Qirg‘izistondan 5,2 milliard so‘mlik tilla buyumlarni noqonuniy olib kirgan shaxs ushlandi
859 dona zargarlik buyumlari bojxona nazoratidan yashirilgan holda olib o‘tilgan.
Davlat xavfsizlik xizmati Andijon va Farg‘ona viloyatlari bo‘yicha boshqarmalari tezkor tadbir o‘tkazdi. “Vodil” chegara-boshqona postida Qirg‘izistondan Farg‘ona viloyatiga kirib kelgan, Andijon shahrida yashovchi 1992-yilda tug‘ilgan fuqaro to‘xtatilib, tekshiruvdan o‘tkazilgan. Uning ustki kiyimlari ostidan yashirilgan 859 dona tilla taqinchoq va 1 dona qo‘l soati topilgan. Bu haqda Zamon.uz'ga DXX xabar qilgan.
Ekspertiza natijalariga ko‘ra, bu buyumlar sof oltindan yasalgan bo‘lib, ayrimlari brilyant toshlari bilan bezatilgan. Ularning umumiy og‘irligi 4 kg 155 grammni, bahosi esa 5 milliard 213 million so‘mni tashkil etadi.
Aniqlanishicha, ushbu qimmatbaho buyumlar Turkiyadan Qirg‘izistonga olib kelingan va Andijon va Farg‘onada yashovchi savdogarlar tomonidan 400 AQSh dollari evaziga bojxonadan olib o‘tilishi rejalashtirilgan.
Hozirda Jinoyat kodeksining 182-moddasi 2-qismi “a” bandi bilan jinoyat ishi qo‘zg‘atilgan. Surishtiruv davomida ushbu zargarlik buyumlarining asl egalari aniqlanmoqda.
