Qozog‘istonda navbatda turgan bemor shifokorni kaltakladi
Sog‘liqni saqlash vaziri shifokorlarni himoya qilishga chaqirdi.
Qozog‘iston Respublikasining Qarag‘andi viloyatida bemor shifokorga hujum qildi. Bu haqida mahalliy nashrlar xabar bermoqda.
Holat 17 iyul kuni tushdan keyin viloyat shifoxonasining urologiya bo‘limida yuz bergan. Jarroh operatsiyadan so‘ng bemorlarni ko‘rish uchun tez yordam bo‘limiga tushgan. Navbatda turgan erkak shifokorni urib yuborgan. Natijada shifokor og‘ir tan jarohatlari olib, hushini yo‘qotgan va reanimatsiyaga yotqizilgan.
“O‘z hayotini saqlab qolgan shifokorlarga qo‘l ko‘tarish uchun inson qay darajada qo‘pol va tajovuzkor bo‘lishi kerak? Tinchlik davrida shifokorlar hayoti xavf ostida qolishi juda achinarli. Bu mutlaqo aqlga sig‘maydigan va qabul qilib bo‘lmaydigan holat”, dedi mamlakat Sog‘liqni saqlash vaziri Akmaral Alanazarova.
Vazirning taʼkidlashicha, tez tibbiy yordam bo‘limlari allaqachon xavfli hududlarga aylanib ulgurgan. Shu sababli SSV va IIV shoshilinch tibbiy yordam, bolalar shifoxonalari va perinatal markazlarda tunu-kun qo‘riqlash postlarini kuchaytirishga qaror qildi. Shuningdek, tibbiyot muassasalari videokuzatuv, tashvish tugmalari va boshqa xavfsizlik qurilmalari bilan jihozlanadi.
“Tibbiyot xodimlariga hujum qilganlik uchun jazoni kuchaytirish bo‘yicha qonunchilikka sentyabr oyida o‘zgartirishlar kiritiladi. Bunday harakatlarni maishiy hodisa sifatida emas, balki jamoat xavfsizligiga tahdid sifatida baholash kerak”, - deya qo‘shimcha qilgan vazir.
