Endi maktabdagi o‘rtacha baholar test sinovlari balliga qo‘shilmaydigan
Prezident farmoni bilan baholarni hisoblash tizimi bekor qilindi.
Endilikda maktabdagi so‘nggi 6 yillik o‘rtacha baholar oliy ta’limga kirish imtihonlarida inobatga olinmaydi. Bu haqda Prezidentning 19-iyul kuni qabul qilingan PF–114-sonli farmonida rasman belgilandi.
Avvalroq, Vazirlar Mahkamasining 2021-yilgi qaroriga ko‘ra, 2023/2024-o‘quv yilidan boshlab abituriyentlarning shahodatnomalaridagi baholari ham test ballariga qo‘shilishi kerak edi. Masalan, 130 ball to‘plagan abituriyentga maktabdagi 3, 4 yoki 5 bahoga mos ravishda 3, 4 yoki 5 ball qo‘shish rejalashtirilgandi. Ammo bu tizim 2023-yilda 2 yilga kechiktirilgan edi. Endi esa, yangi farmonga ko‘ra, bu tartib umuman bekor qilindi.
Shu tariqa, oliy ta’limga kirish imtihonlarida abituriyentlar faqat test natijalariga asoslanib baholanadi. Yangi tizim “avval test, so‘ng tanlov” tamoyili asosida amalga oshiriladi.
Bundan tashqari, farmonda Toshkentdagi Turin politexnika universitetida talabalarni nafaqat Turin universiteti, balki boshqa ilg‘or xorijiy universitetlarning ham o‘quv dasturlari asosida o‘qitish amaliyoti joriy etilishi ko‘zda tutilgan.
