Tibbiyot chiqindilarini yo‘q qilishdagi muammolar: sog‘liqni saqlash vaziriga senator so‘rovi yuborildi
Tibbiyot chiqindilarini yoqish, maishiy chiqindi sifatida sanitariya-tozalash korxonalariga topshirish holatlari aniqlangani qayd etildi.
O‘zbekistonda tibbiyot chiqindilarini xavfsiz to‘plash, tashish va zararsizlantirish bo‘yicha amalga oshirilayotgan ishlar yuzasidan sog‘liqni saqlash vaziriga senator so‘rovi yuborildi.
Senatning Agrar, suv xo‘jaligi masalalari va ekologiya qo‘mitasi raisi A. Tuychiyev tomonidan yuborilgan so‘rovga senatorlar va mahalliy Kengashlar deputatlari tomonidan hududlarda o‘tkazilgan o‘rganishlar asos bo‘lgan.
O‘rganishlar davomida tibbiyot chiqindilarini ochiq usulda yoki maishiy chiqindilar bilan birga yoqish, shuningdek, ularni maishiy chiqindi sifatida sanitariya-tozalash korxonalariga topshirish holatlari uchrayotgani aniqlangan.
Senator so‘rovida tibbiyot chiqindilarining kunlik hajmini yagona elektron hisobga olish hamda ularni belgilangan tartibda qayta ishlash korxonalariga to‘liq yo‘naltirish bo‘yicha amalga oshirilgan ishlar haqida ma’lumot so‘ralgan.
Shuningdek, tibbiyot chiqindilarini to‘plash, tashish, saqlash, zararsizlantirish, utilizatsiya qilish va qayta ishlashga qo‘yilgan talablarga rioya etilishini ta’minlash bo‘yicha ko‘rilayotgan chora-tadbirlar yuzasidan ham axborot berish so‘ralgan.
