22 mingdan ortiq sayyoh: Fransiya O‘zbekistonga turistlar oqimi bo‘yicha Yevropaning top-5 mamlakatiga kirdi
Bu o‘tgan yilning shu davriga nisbatan 20,6 foizga ko‘p.
2026-yilning yanvar–avgust oylarida O‘zbekistonga Fransiyadan 22 055 nafar sayyoh tashrif buyurdi. Bu o‘tgan yilning shu davriga nisbatan 20,6 foizga ko‘p.
Shu tariqa Fransiya O‘zbekistonga kiruvchi turizm hajmi bo‘yicha Yevropaning yetakchi beshta mamlakatidan biriga aylandi. Parij va Toshkent o‘rtasidagi to‘g‘ridan to‘g‘ri aviaqatnovlar ham sayyohlar oqimini yanada oshirish uchun muhim omillardan biri bo‘lib qolmoqda.
Ikki mamlakat o‘rtasidagi turizm hamkorligi sayyohlar almashinuvi bilangina cheklanmayapti. Fransiya kompaniyalari O‘zbekistondagi yirik turizm infratuzilmasi loyihalarida ham ishtirok etmoqda.
Jumladan, tog‘ infratuzilmasiga ixtisoslashgan MND kompaniyasi Chimyonda to‘rt faslda faoliyat yuritadigan kurort yaratish loyihasiga jalb etilgan. Kanat yo‘llari ishlab chiqaruvchi POMA kompaniyasi esa Chimyon va Zomindagi loyihalarni ko‘rib chiqmoqda.
Shuningdek, qator fransuz kompaniyalari Beldersoy–Chimyon–Nanay xalqaro kurorti konsepsiyasini ishlab chiqishda ishtirok etgan. Mehmonxona sohasida Fransiyaning Accor guruhi O‘zbekistonda Mercure, Mövenpick, Swissôtel, ibis va Novotel brendlari bilan faoliyat yuritmoqda.
O‘zbekistonning Parijda o‘tkazilgan IFTM Top Resa 2026 xalqaro turizm ko‘rgazmasida Country of Honour maqomida ishtirok etishi ham ikki mamlakat o‘rtasidagi aloqalarni kengaytirish uchun yangi imkoniyat bo‘ldi.
Turizm qo‘mitasi O‘zbekistonning Fransiyadagi elchixonasi bilan hamkorlikda mamlakatning sayyohlik salohiyatini namoyish etdi. Ko‘rgazma doirasida O‘zbekiston, Fransiya va boshqa davlatlarning turoperatorlari, aviakompaniyalar, mehmonxona biznesi vakillari hamda sohaning boshqa ishtirokchilari bilan B2B uchrashuvlar o‘tkazildi.
Ayni paytda O‘zbekiston xalqaro bozorga taqdim etayotgan turizm mahsulotlari ham kengayib bormoqda. Tarixiy shaharlar bo‘ylab an’anaviy yo‘nalishlar bilan bir qatorda tog‘, sog‘lomlashtirish, gastronomik, ekologik va MICE turizmi imkoniyatlari rivojlantirilmoqda.
Hududlarda amalga oshirilayotgan yangi loyihalar Buyuk Ipak yo‘lining an’anaviy marshrutlarini to‘ldirib, xorijiy sayyohlar uchun mamlakatning turli hududlariga tashrif buyurish imkoniyatlarini kengaytirmoqda.
IFTM Top Resa 2026 ko‘rgazmasida O‘zbekiston yangilangan milliy stend konsepsiyasini ham taqdim etdi. Unda zamonaviy dizayn an’anaviy me’morchilik va madaniyat unsurlari bilan uyg‘unlashtirilib, yog‘och, keramika va muqarnas elementlaridan foydalanilgan.
