Qamoqdagi hokim nomidan 1,2 milliard so‘mlik qarorlar imzolangan
Sharof Rashidov tumani hokimi haqida tarqalgan xabarlar bo‘yicha rasmiy tekshiruv boshlandi.
Jizzax viloyati Sharof Rashidov tumani hokimi Mahmud Xolbo‘tayev 8 iyul kuni 10 ming dollar pora olayotgan vaqtda DXX xodimlari tomonidan qo‘lga olinib, qamoqqa olingan edi.
Ammo “E-qaror” tizimidagi ma’lumotlarga ko‘ra, Xolbo‘tayev hibsda bo‘lgan kunlarda ham uning nomidan qarorlar qabul qilingan. Xususan, 8 va 9 iyul kunlari jami 1,2 milliard so‘m mablag‘ ajratish bo‘yicha 5 ta mahalliy kengash qarori rasmiylashtirilgan.
Ulardan ikkitasi aynan u qo‘lga olingan 8 iyul kuni, qolgan uchtasi esa 9 iyul kuni qabul qilingan. Barcha qarorlarda hokim Mahmud Xolbo‘tayevning nomi ko‘rsatilgan.
Ijtimoiy tarmoqlarda ushbu holat bo‘yicha tarqalgan xabarlarga javoban, Sharof Rashidov tuman prokuraturasi tergovga qadar tekshiruv ishlarini boshlagan. bu haqda Jizzax viloyati prokuraturasi rasmiy munosabat bildirgan.
Tekshiruv natijalariga ko‘ra, ushbu holat yuzasidan qonuniy qaror qabul qilinishi ma’lum qilingan.
