Toshkentda qurilish sabab katta yashil hudud yo‘q qilingani aytilmoqda
Holat bo'yicha Ekologiya vazirligiga deputatlik so‘rovi yuborildi.
Ijtimoiy tarmoqlarda Toshkent shahri Mirobod tumanidagi Avliyo ota ko‘chasi, 124-uy manzilida joylashgan katta yashil hudud yo‘q qilinib, o‘rnida qurilish ishlari boshlanganiga oid xabarlar keng tarqaldi.
Tarqalgan suratlarda ilgari daraxtlarga boy bo‘lgan hudud hozirda mutlaqo tekkis holatga kelgani, faqatgina tuproq va texnika qolganini ko‘rish mumkin. Yashil maydon izsiz yo‘q bo‘lgan.
Aholi vaziyatdan jiddiy xavotirda. “Qurilish zarur, ammo bu tabiatni yo‘q qilish hisobiga bo‘lmasligi kerak. Shahar faqat binolardan emas, soyali daraxtlar, toza havo beruvchi yashil hududlardan ham iborat bo‘lishi lozim,” — deya norozilik bildirmoqda fuqarolar.
Mazkur holat yuzasidan O‘zbekiston Ekologik partiyasi deputati Navro‘zbek Yusupov tomonidan Bosh prokuratura va Ekologiya, atrof-muhitni muhofaza qilish vazirligiga deputatlik so‘rovi yuborildi.
