Qashqadaryoda yangi dor yo‘li ishga tushirildi
Uning umumiy uzunligi 2084 metrni tashkil qiladi.
“Shahrisabz” turistik markazida yangi zamonaviy loyiha — “Miraki” dor yo‘li o‘z faoliyatini boshladi. Bu haqida Qashqadaryo viloyati hokimiligi xabar qildi.
Loyiha qiymati 160 milliard so‘mni tashkil etib, dor yo‘li Avstriyaning mashhur Doppelmayr Seibahnen GmbH kompaniyasi tomonidan ishlab chiqarilgan.
Dor yo‘l tizimida 7 ta mustahkam minora, 20 ta 8 o‘rinli Carvatech kabinalar mavjud bo‘lib, uning umumiy uzunligi 2084 metrni tashkil qiladi. Bu zamonaviy transport vositasi har soatda 660 nafar yo‘lovchini tashish imkoniyatiga ega.
Pastki bekatda dvigatel mexanizmi, lift, suvenir do‘koni, kafe, tibbiyot punkti, ona va bola xonasi, bankomat, avtoturargoh, elektromobillarni quvvatlash stansiyasi joylashgan. Yuqori bekatda esa mehmonlar uchun umumiy ovqatlanish shoxobchasi, bolalar o‘yin maydonchasi, tomosha zonalari, selfi uchun maxsus maskanlar tashkil etilgan.
