18 mln dan ortiq firibgarlik operatsiyasi: banklarda 461 mlrd so‘mlik mablag‘ chiqib ketishining oldi olindi
Banklardagi antifrod tizimlarining 6 oylik natijalarni e’lon qilindi.
O‘zbekistonda 2026-yilning birinchi yarmida tijorat banklarida qiymati 461 milliard so‘mdan ortiq bo‘lgan 18 milliondan ziyod firibgarlik operatsiyasining oldi olindi. Bu haqda Markaziy bank ma’lum qildi.
Ma’lum qilinishicha, Prezidentning PQ-381-son qaroriga muvofiq, tijorat banklarida mijozlar mablag‘lari va mobil qurilmalarini turli raqamli xavflardan himoya qilishga qaratilgan Session antifrod hamda antivirus tizimlari joriy etilgan.
Session antifrod tizimi bank operatsiyalarini xavf darajasiga ko‘ra tahlil qiladi. Yuqori xavfli deb baholangan operatsiyalar avtomatik tarzda cheklanib, shubhali tranzaksiyalar orqali mablag‘larning chiqib ketish xavfini kamaytiradi.
2026-yilning dastlabki olti oyida mazkur tizimlar orqali 18 milliondan ortiq firibgarlik operatsiyasining oldi olingan. Ushbu operatsiyalarning umumiy qiymati 461 milliard so‘mdan oshgan.
Firibgarlik holatlarining oldini olish bo‘yicha eng yuqori ko‘rsatkich “Xalq banki”da qayd etilgan — 2,2 millionta. “Ipak yo‘li banki”da esa 1,4 milliondan ortiq shunday holatlarning oldi olingan. “Hamkorbank” va “Milliy bank”da ham yarim yil davomida 100 mingdan ortiq firibgarlik operatsiyasi cheklangan.
Shuningdek, tijorat banklarining mobil ilovalarida zararli dasturlarni aniqlovchi antivirus tizimlari ham ishlamoqda. Ular qurilmalardagi zararli .apk fayllar va dasturlarni aniqlash orqali mobil bank xizmatlaridan xavfsiz foydalanishga ko‘maklashadi.
Olti oy davomida antivirus tizimlari yordamida 1,29 millionta qurilmaga kirish cheklangan, qariyb 2 millionta qurilma esa zararli dasturlardan tozalangan.
Markaziy bankka ko‘ra, ushbu himoya mexanizmlari firibgarlik xavfini erta aniqlash, shubhali operatsiyalarni o‘z vaqtida cheklash hamda bank mijozlarining mablag‘lari va mobil qurilmalarini himoya qilishga xizmat qilmoqda.
