Shahnoza Mirziyoyeva Xalqaro suzish federatsiyasi byurosi a’zoligiga saylandi
Singapurda Butunjahon suzish federatsiyasining navbatdagi Kongressi bo‘lib o‘tdi.
29-iyul kuni Singapurda bo‘lib o‘tgan Xalqaro suzish federatsiyasi — World Aquatics Kongressida O‘zbekiston Paralimpiy qo‘mitasi raisi o‘rinbosari Shahnoza Mirziyoyeva tashkilotning Bюro a’zoligiga saylandi. Bu nufuzli lavozim O‘zbekiston vakili uchun sport diplomatiyasida muhim qadamlardan biri sifatida baholanmoqda.
“Men uchun bu tashkilotning bir qismi bo‘lish va O‘zbekiston manfaatlarini global darajada ilgari surish katta mas’uliyatdir,” — dedi Mirziyoyeva o‘zining ijtimoiy tarmoqdagi sahifasida. U, shuningdek, bu yutuqni sportni hammaga ochiq qilish yo‘lida mehnat qilayotgan jamoasining muvaffaqiyati deb atadi.
Shahnoza Mirziyoyeva ushbu lavozim orqali suv sport turlarini rivojlantirishga yanada ko‘proq e’tibor qaratilishini ta’kidladi. Uning fikricha, World Aquatics doirasidagi sport turlari ommabopligini oshirish va o‘zbek sportchilarining xalqaro maydonlarda faol ishtirokini kuchaytirish muhim vazifa bo‘lib qoladi.
Ma’lumot uchun, Mirziyoyeva ayni paytda O‘zbekiston Paralimpiy qo‘mitasi raisi o‘rinbosari lavozimidan tashqari, Ijtimoiy himoya milliy agentligi direktorining birinchi o‘rinbosari sifatida ham faoliyat yuritmoqda.
