Navoiyda havoni ifloslantirgan 22 ta korxona faoliyati vaqtincha to‘xtatildi
Shuningdek, kamchiliklarini bartaraf etmagan 19 ta korxonalarning faoliyatini to‘xtatish bo‘yicha sudga daʼvo arizalari kiritilgan.
Ekologiya, atrof-muhitni muhofaza qilish va iqlim o‘zgarishi vazirligi rahbariyati hamda Bosh prokuraturadan iborat ishchi guruh Ekologiya vazirining topshirig‘iga binoan Navoiy shahrida o‘rganish ishlarini olib bormoqda.
O‘rganish ikki yo‘nalishda olib borilmoqda: birinchisi — shaharda qayd etilgan oq tuman (yoki oq tutun) manbaini aniqlash, ikkinchisi — sanoat chiqindilari bilan bog‘liq umumiy ekologik vaziyatni yaxshilash.
19 iyul kuni Navoiy shahrida atmosfera havosining oq tutun bilan ifloslanishi bo‘yicha laboratoriya tahlillari va boshqa maʼlumotlar to‘plandi. Navoiy shahri hududi bo‘ylab 11 ta nuqtadan ko‘chma laboratoriya orqali havoning ifloslanish darajasi tahlil qilinganda oltingurgurt ikki oksidi (So₂) belgilangan meʼyordan 1,86 baravar, ammiak (NH₃) esa 1,43 baravar yuqori ekanligi maʼlum bo‘lgan.
Shuningdek, Navoiy shahrida umumiy ekologik vaziyatni o‘rganish va yaxshilash bo‘yicha 3 ta guruh shakllantirilib, shahar va unga tutash hududlardagi 168 ta sanoat korxonasi faoliyati o‘rganilmoqda.
Bugunga qadar 42 ta korxona o‘rganilib, ekologiya sohasidagi qonun talabalariga rioya etmagan mansabdor shaxslarga nisbatan jarima choralarini qo‘llash uchun sud organlariga materiallar tayyorlangan.
22 ta korxona faoliyati ekologik ekspertizadan o‘tkazilmaganligi, atmosfera, yer va suv muhofazasi bilan bog‘liq talablar qo‘pol ravishda buzilganligi, betartib chiqindixonalar yaratilganligi sababli ularning faoliyatini vaqtinchalik to‘xtatib turish to‘g‘risida qaror qabul qilingan. Ushbu korxonalarga ham 10 kunlik muddat berildi. Kamchiliklarini bartaraf etmagan 19 ta korxonalarni faoliyatini to‘xtatish bo‘yicha sudga daʼvo arizalari kiritilgan.
