Piskent avtopoligonidagi avtomobil sinovlari bekor qilindi
Endilikda avtomobillarni sinovdan o‘tkazish amaliyoti rasmiy dilerlar tizimi orqali amalga oshiriladi.
2-sentabrdan boshlab avtomobillarni Piskent avtopoligonida sinovdan o‘tkazish amaliyoti to‘xtatildi.
O‘zbekiston texnik jihatdan tartibga solish agentligining ma’lum qilishicha, so‘nggi yillarda mamlakatimizda xorijiy avtomobil ishlab chiqaruvchilarining 21 ta rasmiy dileri faoliyat boshlagan. Shuningdek, 100 dan ortiq avtomobil rusumlari uchun turini ma’qullash hujjatlari rasmiylashtirilgan.
Natijada, iste’molchilarga rasmiy dilerlar orqali kafolatlangan transport vositalarini xarid qilish imkoniyati kengaytirildi. Shuningdek, respublika bo‘ylab dilerlik va servis markazlari sonining ortishi, aholining to‘g‘ridan-to‘g‘ri rasmiy vakillar bilan ishlash tizimiga o‘tishi inobatga olinib, Piskent avtopoligonida avtomobillarni sinovdan o‘tkazish jarayonlariga ehtiyoj qolmagan.
