Naqdsiz hisob-kitoblarga o‘tish uy joy ijara narxlariga qanday ta’sir qildi?

Toshkent shahrida uy-joy ijara bozorida narxlar naqdsiz hisob-kitoblarga o‘tish ortidan keskin o‘zgarmagan. Bu haqda Makroiqtisodiy va hududiy tadqiqotlar instituti tomonidan o‘tkazilgan tahlilda ma’lum qilindi.

 

Institut OLX platformasida joylashtirilgan 1,7 milliondan ortiq e’lonlar asosida 2026-yil aprel oyidagi bozor holatini o‘rgangan. Qayd etilishicha, 1-apreldan uy-joy oldi-sotdisida hisob-kitoblarning naqdsiz shaklga o‘tkazilishi ijara narxlarida darhol o‘sishga olib kelmagan.

 

Ma’lumotlarga ko‘ra, 2026-yil mart va aprel oylarida umumiy median ijara narxi bir xil — 550 dollar darajasida saqlanib qolgan. Shuningdek, e’lonlar sonida ham sezilarli o‘zgarish kuzatilmagan: yanvar–mart oylarida o‘rtacha 22,6 ming e’lon joylashtirilgan bo‘lsa, aprel oyida bu ko‘rsatkich 22,8 mingtani tashkil etgan.

 

Shu bilan birga, bozor segmentlar kesimida turlicha dinamikani namoyon etmoqda. Xususan, bir xonali uylar narxi yiliga 14,3 foizga, ikki xonali uylar esa 10 foizga oshgan. Aksincha, uch xonali uylar narxi 12,5 foizga, to‘rt va undan ortiq xonali uylar esa 26,1 foizga arzonlashgan.

 

Hududlar kesimida eng yuqori ijara narxlari Mirobod (800 dollar), Shayxontohur (750 dollar) va Yakkasaroy (700 dollar) tumanlarida qayd etilgan. Nisbatan arzon hududlar sifatida Bektemir (390 dollar), Sergeli va Uchtepa (har biri 400 dollar) ko‘rsatilgan.

 

Shuningdek, ayrim hududlarda o‘sish kuzatilgan: Olmazor tumanida narxlar 12,5 foizga, Mirzo Ulug‘bek tumanida esa 9,1 foizga oshgan. Biroq “premium” hududlarda narxlar pasaygan — Shayxontohurda 25 foizga, Mirobodda 11,1 foizga, Yakkasaroyda 6,7 foizga.

 

Tahlil mualliflariga ko‘ra, ijara bozori umumiy ko‘rsatkichlar bo‘yicha barqaror qolayotgan bo‘lsa-da, talab asosan arzonroq va kichik — 1-2 xonali uylar segmentiga siljimoqda.

 

Mutaxassislar yakuniy xulosa chiqarish uchun 2026-yilning keyingi choraklaridagi bozor tendensiyalarini kuzatish muhimligini ta’kidlagan.