Shavkat Mirziyoyev Pokiston prezidenti va bosh vaziriga ta’ziya bildirdi
Balujistondagi portlash oqibatida 23 kishi halok bo‘lgan, 70 kishi jarohatlangan edi.
Shavkat Mirziyoyev Pokistonning Balujiston provinsiyasida sodir etilgan terrorchilik harakati oqibatida ko‘plab insonlar halok bo‘lgani munosabati bilan Pokiston Prezidenti Asif Ali Zardoriy hamda Bosh vazir Shahboz Sharifga ta’ziya yo‘lladi.
Prezident matbuot xizmati ma’lumotiga ko‘ra, davlat rahbari halok bo‘lganlarning oila a’zolari va yaqinlariga chuqur hamdardlik bildirib, jarohatlanganlarning tez fursatda sog‘ayib ketishini tilagan.
Eslatib o‘tamiz, 24-may kuni Pokistonning Balujiston provinsiyasidagi temiryo‘l yaqinida portlash sodir bo‘lgan edi. Hodisa oqibatida 23 kishi halok bo‘lgan, yana 70 kishi turli darajadagi tan jarohatlari olgan.
Ma’lumotlarga ko‘ra, portlash oqibatida poyezdlardan biriga qisman shikast yetgan, shuningdek, yaqin hududda to‘xtab turgan avtomobillar ham zarar ko‘rgan. Kuchli portlash to‘lqini sabab atrofdagi binolarning oynalari singan.
Temiryo‘l ma’muriyati xavfsizlik nuqtayi nazaridan Peshavor shahriga yo‘l olgan “Jaffar Express” poyezdi Kvetta bekatida vaqtincha to‘xtatilganini ma’lum qilgan.
