Покистонда портлаш оқибатида камида 19 киши ҳалок бўлди
Мазкур портлаш учун жавобгарликни “Балужистон озодлик армияси” гуруҳи ўз зиммасига олди.
Покистоннинг жануби-ғарбидаги Кветта шаҳрида йўловчи поезди ўтаётган пайтда худкуш террорчи портловчи моддалар ортилган автомобилни темирйўл яқинида портлатди. Бу ҳақда AP хабар берди.
Расмийларга кўра, ҳодиса оқибатида камида 19 киши ҳалок бўлган, 70 дан ортиқ одам яраланган.
Ижтимоий тармоқларда тарқалган видеоларда портлаш кучи сабаб поезднинг икки вагони ағдарилиб, ёниб кетгани ва осмонни қалин қора тутун қоплагани акс этган.
Гувоҳлар ҳамда ижтимоий тармоқларда тарқалган суратларга кўра, ҳужум хавфсизлик кучлари одатда жойлашадиган ҳудудда содир бўлган. Портлаш натижасида яқин атрофдаги бир нечта бино жиддий зарар кўрган ва йўл бўйида турган ўндан ортиқ автомобиль шикастланган.
Ярадорлар шифохонага олиб кетилган бўлиб, уларнинг 20 нафари оғир аҳволда.
Покистон марказий ҳукуматидан мустақиллик талаб қилувчи тақиқланган “Балужистон озодлик армияси” (БЛА) гуруҳи журналистларга юборган баёнотида ҳужум учун жавобгарликни ўз зиммасига олди. Гуруҳ баёнотида хавфсизлик ходимларини олиб кетаётган поезд нишонга олингани айтилган.
“Биз бегуноҳ фуқароларнинг нишонга олиниши ва одамларнинг ҳалок бўлганидан чуқур қайғудамиз. Террорчи унсурларга ҳеч қандай ён босиш бўлиши мумкин эмас”, — деди Балужистон вилояти ҳукумати матбуот котиби Шаҳид Ринд.
Унинг сўзларига кўра, портлашдан кейин Кветта шифохоналарида фавқулодда тиббий ҳолат эълон қилинган ва ҳодиса юзасидан тергов бошланган.
Покистон ҳукумати қўзғолон бостирилганини таъкидлаётган бўлса-да, Балужистонда зўравонликлар давом этмоқда.
2024 йилда Балужистондаги темирйўл вокзалига уюштирилган худкуш ҳужум оқибатида камида 26 киши ҳалок бўлган.
