Bugun barcha xodimlar ishdan 1 soat oldin ketish huquqiga ega
Mehnat kodeksiga ko‘ra, bayram arafasida ish kuni kamida 1 soatga qisqartiriladi.
Mehnat kodeksining 187-moddasiga muvofiq, ishlanmaydigan bayram kunlari arafasida har kunlik ish vaqti barcha xodimlar uchun kamida bir soatga qisqartiriladi.
Shu munosabat bilan, ertaga — 27-may kuni Qurbon hayitining birinchi kuni nishonlanishi hamda ushbu sana dam olish kuni hisoblanishi sababli, bugun ishga chiqqan xodimlar ish faoliyatini bir soat oldin yakunlash huquqiga ega.
Qonunchilikka ko‘ra, bayramoldi kuni ish vaqtini qisqartirish imkoniyati mavjud bo‘lmagan uzluksiz faoliyat yurituvchi tashkilotlar va ayrim turdagi ishlarda ortiqcha ishlangan vaqt xodimga qo‘shimcha dam berish yoki uning roziligi asosida ish vaqtidan tashqari mehnat uchun belgilangan tartibda haq to‘lash orqali kompensatsiya qilinadi.
Qurbon hayiti munosabati bilan dam olish kunlari quyidagicha belgilangan:
— 27-may, chorshanba — Qurbon hayiti;
— 28-may, payshanba — qo‘shimcha dam olish kuni;
— 29-may, juma — qo‘shimcha dam olish kuni;
— 30-may, shanba — haftasiga 6 kun ishlovchilar uchun qo‘shimcha dam olish kuni;
— 31-may, yakshanba — odatiy dam olish kuni.
Shu tariqa, fuqarolar uchun ketma-ket bir necha kunlik dam olish imkoniyati yaratiladi.
