Saida Mirziyoyeva BMTning jinoyatchilikka qarshi kurash bo‘yicha komissiyasining 35-sessiyasida ishtirok etdi
O‘zbekistonning jinoyatchilik profilaktikasi borasidagi tajribasi xalqaro ekspertlar tomonidan yuqori baholandi.
Vena shahrida BMTning Jinoyatchilikning oldini olish va jinoiy odil sudlov bo‘yicha komissiyasining 35-sessiyasi bo‘lib o‘tdi. Unda 175 ta davlatdan 1,5 mingdan ziyod yuqori martabali rahbar va ekspertlar ishtirok etdi. Bu yil O‘zbekiston ilk bor ushbu nufuzli tuzilmaga a’zo bo‘ldi. Sessiyada Prezident Administratsiyasi rahbari Saida Mirziyoyeva ishtirok etib, nutq so'zladi.
Ta’kidlanganidek, O‘zbekistonning ushbu nufuzli komissiyaga to‘laqonli a’zo etib saylanishi mamlakatning xalqaro huquqiy siyosat va global kun tartibini shakllantirish jarayonlaridagi ishtirokini yanada mustahkamladi.
BMTning Giyohvand moddalar va jinoyatchilik bo‘yicha boshqarmasining Afg‘oniston, Markaziy Osiyo, Eron va Pokiston bo‘yicha mintaqaviy vakili Oliver Shtolpe O‘zbekistonning komissiyadagi ishtirokini yuqori baholab, mamlakat transmilliy tahdidlarga qarshi kurash masalasiga jiddiy yondashayotganini ta’kidlagan.
Uning qayd etishicha, O‘zbekiston tomonidan ilgari surilgan yondashuv jinoyatchilikning oldini olishni faqat huquqni muhofaza qiluvchi organlar faoliyati sifatida emas, balki oila va mahalliy hamjamiyatlardan boshlanadigan kompleks jarayon sifatida ko‘rib chiqishi bilan ahamiyatlidir.
Shuningdek, Oliver Shtolpe huquqbuzarliklar profilaktikasi inspektorlari instituti faoliyatini alohida e’tirof etib, ushbu tajribani o‘rganish va ikki tomonlama hamkorlikni yanada kengaytirishga qiziqish bildirdi.
