Saida Mirziyoyeva UNEP va GEF rahbarlari bilan uchrashdi
Uchrashuvlarda cho‘llanishga qarshi kurash, biologik xilma-xillikni asrash va resurslardan oqilona foydalanish masalalari muhokama qilindi.
Samarqand shahrida o‘tayotgan Global ekologik jamg‘armaning (GEF) 8-Assambleyasi doirasida Prezident Administratsiyasi rahbari Saida Mirziyoyeva BMT Bosh kotibi o‘rinbosari, BMT Atrof-muhit dasturi (UNEP) ijrochi direktori Inger Andersen hamda Global ekologik jamg‘arma bosh ijrochi direktori Klod Gaskon bilan uchrashuvlar o‘tkazdi.
Muloqot chog‘ida Markaziy Osiyo mintaqasi uchun dolzarb bo‘lgan ekologik masalalar, jumladan, cho‘llanish va yerlar degradatsiyasiga qarshi kurashish, havo sifati monitoringini takomillashtirish, biologik xilma-xillikni asrash hamda tabiiy resurslardan oqilona foydalanish yo‘nalishlaridagi hamkorlik istiqbollari muhokama qilindi.
Saida Mirziyoyeva UNEP va GEF rahbariyatiga O‘zbekistonda amalga oshirilayotgan “yashil” islohotlarni qo‘llab-quvvatlayotgani hamda ekologik barqarorlikni ta’minlashga qaratilgan tashabbuslarga qo‘shayotgan hissasi uchun minnatdorlik bildirdi.
Shuningdek, u Global ekologik jamg‘armaning Samarqandda o‘tkazilgan tarixiy 8-Assambleyasi muvaffaqiyatli o'tgani bilan xalqaro tashkilotlar vakillarini tabrikladi.
