Shavkat Mirziyoyev Filippin prezidentiga ta'ziya yo'lladi
O‘zbekiston Prezidenti zilzila qurbonlarining oila a’zolari va yaqinlariga hamdardlik bildirib, jarohatlanganlarning tezroq sog‘ayib ketishini tiladi.
Shavkat Mirziyoyev Filippinning janubiy hududlarida yuz bergan kuchli zilzila oqibatida ko‘plab insonlarning halok bo‘lgani va jarohat olgani munosabati bilan Ferdinand Markosga ta’ziya yo‘lladi. Bu haqda Prezident matbuot xizmati ma’lum qildi.
Shavkat Mirziyoyev Filippinning Mindanao oroli janubiy sohillarida sodir bo‘lgan tabiiy ofat oqibatida halok bo‘lganlarning oila a’zolari va yaqinlariga samimiy hamdardlik izhor etib, jabrlanganlarning tez fursatda sog‘ayib ketishini tilagan.
Eslatib o'tamiz, 8-iyun kuni Filippin qirg‘oqlari yaqinida yuz bergan kuchli zilzila oqibatida 32 kishi halok bo‘lgan, yana 134 nafar fuqaro turli darajadagi tan jarohatlari olgan edi. Tabiiy ofat sabab hududda qutqaruv va tiklash ishlari davom etmoqda.
