Yangi Namanganda IT-park qurilishiga tamal toshi qo‘yildi
IT-parkda ta’lim, eksport markazlari va startap ekotizimi tashkil etiladi.
Prezident Shavkat Mirziyoyev Davlatobod tumanidagi Yangi Namangan shaharchasida IT-park qurilishiga tamal toshi qo‘yish marosimida ishtirok etdi.
Qayd etilganidek, joriy yil boshidan Namangan viloyatiga 2 milliard dollar xorijiy investitsiya jalb etilgan. Xitoy, Turkiya, Hindiston va Rossiyalik hamkorlar bilan hamkorlikda umumiy qiymati 1,8 milliard dollarlik 20 ta yangi loyiha ishga tushirilmoqda. Ushbu loyihalar hisobiga 6,5 mingta ish o‘rni yaratilishi, 30 dan ortiq yangi mahsulot ishlab chiqarilishi, viloyat iqtisodiyotiga 3,6 trillion so‘mlik aylanma hamda 200 million dollarlik eksport hajmi qo‘shilishi kutilmoqda.
Shuningdek, viloyatda sanoat, turizm, savdo va uy-joy qurilishi yo‘nalishlarida qiymati 4 milliard dollarlik 28 ta yangi loyihaga ham start berildi.
Prezident Namangan viloyatida 1,6 milliondan ortiq yoshlar istiqomat qilayotgani ulkan ijtimoiy-iqtisodiy salohiyat ekanini qayd etdi. Yoshlarni axborot texnologiyalari va sun’iy intellekt yo‘nalishlarida zamonaviy kasblarga o‘qitish orqali yuqori daromadli ish o‘rinlarini yaratish muhimligi ta’kidlandi.
Xitoylik hamkorlar bilan hamkorlikda umumiy qiymati 117 million dollar bo‘lgan loyiha asosida Yangi Namangan, Samarqand, Chirchiq, Nurafshon, Urganch va Navoiy shaharlarida zamonaviy IT-parklar barpo etilishi rejalashtirilgan. Yangi Namangan IT-parki mazkur loyihaning ilk bosqichi hisoblanadi.
1,7 gektar maydonda quriladigan 17 qavatli majmuaning umumiy maydoni qariyb 18 ming kvadrat metrni tashkil etadi. Unda ta’lim va eksport markazlari, kovorking va ofis maydonlari, startap akseleratori hamda xorijiy kompaniyalarga xizmat ko‘rsatish tizimi yo‘lga qo‘yiladi.
Majmuada o‘nlab kompaniyalar va startap studiyalar faoliyat yuritishi, 2 mingga yaqin yoshlar uchun yuqori daromadli ish o‘rinlari yaratilishi ko‘zda tutilgan. Loyiha viloyatda axborot texnologiyalari xizmatlari hajmini yiliga 500 milliard so‘mga, eksport hajmini esa 30 million dollarga yetkazishga xizmat qiladi.
Marosim yakunida Prezident Shavkat Mirziyoyev Yangi Namangan IT-parki qurilishiga tamal toshini qo‘ydi. Shuningdek, viloyatda yangi loyihalarni ishga tushirish va qurilishiga start berish marosimi bo‘lib o‘tdi.
