SHHTga a’zo davlatlar forumi: madaniy hamkorlik va o‘zaro anglashuv yo‘lidagi muhim qadam
Forumda globallashuv sharoitida madaniyatlararo muloqotni rivojlantirish, xalqlar o‘rtasidagi ishonchni mustahkamlash va turli sivilizatsiyalar vakillari o‘rtasidagi hamkorlikni kengaytirish masalalari muhokama qilindi.
III Xalqaro Maqom san’ati forumi doirasida “SHHTga a’zo davlatlarning madaniyatlararo muloqoti” forumi bo‘lib o‘tdi. Bu haqda Zamon.uz muxbiri xabar bermoqda.
Tadbirda Shanxay hamkorlik tashkilotiga a’zo davlatlarning madaniyat vazirlari, xalqaro tashkilotlar vakillari, ekspertlar, san’at va madaniyat sohasi mutaxassislari ishtirok etdi.
Forum davomida ta’kidlanganidek, madaniy-gumanitar hamkorlik SHHT faoliyatining ustuvor yo‘nalishlaridan biri hisoblanadi. Tashkilotga a’zo davlatlar o‘zaro hurmat, yaxshi qo‘shnichilik, ishonch va madaniy xilma-xillik tamoyillari asosida hamkorlikni izchil rivojlantirib kelmoqda. Joriy yilda SHHT tashkil etilganining 25 yilligi nishonlanayotgani forumga alohida ramziy ahamiyat bag‘ishladi. So‘zga chiqqanlar o‘tgan davr mobaynida SHHT siyosiy, iqtisodiy va gumanitar sohalarda samarali hamkorlikni yo‘lga qo‘ygan nufuzli xalqaro tuzilmaga aylanganini qayd etdilar.
Forumda bugungi globallashuv sharoitida madaniyatlararo muloqotni rivojlantirish, xalqlar o‘rtasidagi ishonchni mustahkamlash, stereotiplarni bartaraf etish hamda turli sivilizatsiyalar vakillari o‘rtasida samarali muloqotni kengaytirish muhim vazifa ekani ta’kidlandi. O‘zbekiston Respublikasi Prezidenti Shavkat Mirziyoyev tashabbusi bilan tashkil etilgan mazkur forum SHHT makonida madaniy hamkorlikni yangi bosqichga olib chiqishga xizmat qilishi qayd etildi.
O‘zbekiston tashkilotning madaniy loyihalarida faol ishtirok etib, kino, teatr, musiqa, raqs san’ati, muzeylar faoliyati hamda boshqa yo‘nalishlarda a’zo davlatlar bilan samarali hamkorlikni yo‘lga qo‘ygan.
Shuningdek, “Madaniyat kunlari” tadbirlarini o‘tkazish, qo‘shma teatr gastrollari, muzey ko‘rgazmalari va xalqaro festivallarda o‘zaro ishtirok etish madaniy aloqalarni mustahkamlashning muhim vositasi sifatida e’tirof etildi.
Forumda SHHT mamlakatlari aholisi soni 3 milliarddan ortiq ekani, bu esa dunyo aholisining qariyb yarmini tashkil qilishi qayd etilib, mazkur salohiyatdan samarali foydalanish, qo‘shma madaniy loyihalar sonini ko‘paytirish zarurligi ta’kidlandi.
Tadbir davomida SHHTga a’zo davlatlar oldida turgan ustuvor vazifalar ham belgilab olindi. Xususan, milliy an’ana va qadriyatlarni asrashga qaratilgan madaniy loyihalarni amalga oshirish, madaniy merosni raqamlashtirish, sun’iy intellekt texnologiyalaridan foydalanish orqali uni saqlash, yoshlar loyihalarini qo‘llab-quvvatlash hamda xalqaro forum va festivallardagi hamkorlikni kengaytirish masalalariga alohida e’tibor qaratildi.
Forum yakunida madaniy-gumanitar aloqalarni yanada mustahkamlash, SHHT makonida do‘stlik, yaxshi qo‘shnichilik va o‘zaro anglashuv muhitini rivojlantirishga qaratilgan tashabbuslarni qo‘llab-quvvatlash bo‘yicha fikrlar bildirildi.
Ishtirokchilar mazkur forum SHHT davlatlari o‘rtasidagi madaniy hamkorlikni mustahkamlash, xalqlarni yanada yaqinlashtirish va “Shanxay ruhi” tamoyillarini amalda ro‘yobga chiqarishga xizmat qilishiga ishonch bildirdilar.
