Turkiya mundialni g‘alaba bilan tark etdi
Terma jamoa JCH-2026ni AQSh ustidan g‘alaba bilan yakunladi.
AQShning Kaliforniya shtatidagi Inglevud shahrida bo‘lib o‘tgan bahsda hisobni mezbonlar 3-daqiqada Oston Trasti goli bilan ochdi. Oradan ko‘p o‘tmay Arda Gyuler 10-daqiqada muvozanatni tiklagan, 31-daqiqada esa Barish Yilmaz Turkiyaga ustunlik olib kelgan.
Ikkinchi bo‘lim boshida AQSh hisobni tenglashtirdi. Uchrashuvning qo‘shib berilgan daqiqalarida Kaan Ayhan kiritgan gol Turkiyaga 3:2 hisobidagi g‘alabani taqdim etgan.
Mazkur uchrashuv turnir jadvali nuqtayi nazaridan har ikki jamoa uchun hal qiluvchi ahamiyatga ega emas edi. AQSh terma jamoasi avvalgi turlarda Paragvay va Avstraliya ustidan qozonilgan g‘alabalar evaziga muddatidan oldin pley-off masalasini hal qilgan edi.
Turkiya esa guruh bosqichidagi dastlabki ikki uchrashuvda Avstraliya (0:2) va Paragvayga (0:1) mag‘lub bo‘lgani sababli pley-offga chiqish imkoniyatidan ayrilgandi.
Guruhning parallel uchrashuvida Avstraliya va Paragvay durang o‘ynadi. Har ikki jamoa to‘rt ochkodan jamg‘argan bo‘lsa-da, to‘plar nisbatiga ko‘ra Avstraliya ikkinchi o‘rinni egallab, pley-off yo‘llanmasini qo‘lga kiritgan. Paragvay esa eng yaxshi uchinchi o‘rin egalaridan biri sifatida keyingi bosqichga chiqish imkoniyatini saqlab qolgan.
Ma’lumot uchun, 2026-yilgi Jahon chempionati tarixda ilk bor 48 ta terma jamoa ishtirokida AQSh, Kanada va Meksika mezbonligida o‘tkazilmoqda. Turnirning 1/16 final bosqichi 28-iyundan boshlanadi, final uchrashuvi esa 19-iyul kuni bo‘lib o‘tadi.
