O‘zbekistonda elektr iste’moli yangi rekord o‘rnatdi: yozgi ko‘rsatkich qishki maksimumdan ham oshdi

 

O‘zbekistonda elektr energiyasi iste’moli bo‘yicha yangi rekord qayd etildi. Yozgi sutkalik iste’mol hajmi ilk bor qish mavsumidagi tarixiy maksimumdan ham oshdi.

 

Energetika vazirligi ma’lumotiga ko‘ra, 2026-yil 14-iyul kuni mamlakat yagona energetika tizimida sutkalik elektr energiyasi iste’moli 284 million kVt·soatni tashkil etgan. Mazkur ko‘rsatkich 13-iyul kuni qayd etilgan yozgi rekorddan 5,4 million kVt·soatga (1,94 foiz), shuningdek, 24-yanvarda qayd etilgan qishki maksimumdan 1 million kVt·soatga yuqori bo‘lgan.

 

Shu kuni elektr energiyasi ishlab chiqarish hajmi ham rekord darajaga yetib, 287,3 million kVt·soatni tashkil etgan. Bu qish mavsumidagi eng yuqori ishlab chiqarish hajmidan 9,7 million kVt·soatga (3,49 foiz) ko‘pdir.

 

Vazirlik ma’lum qilishicha, yuqori yuklama davrida elektr ta’minoti barqarorligini saqlash maqsadida avariya-ta’mirlash brigadalari kuchaytirilgan tartibda ishlamoqda. Xususan, Toshkent shahrining ayrim tumanlari hamda Qashqadaryo viloyatida shamol oqibatida yuzaga kelgan nosozliklar tezkor bartaraf etilgan.

 

Ayni paytda hududlarda elektr stansiyalari, podstansiyalar, transformator punktlari va elektr uzatish tarmoqlarini modernizatsiya qilish hamda quvvatini oshirish bo‘yicha rejali ishlar davom ettirilmoqda.

 

Energetika vazirligi ayrim hududlarda yuqori yuklama sabab elektr ta’minotida vaqtinchalik uzilishlar kuzatilishi mumkinligini bildirib, fuqarolarni elektr energiyasidan oqilona foydalanishga chaqirdi. Xususan, konditsionerlarni 24–26°C haroratda ishlatish va ularning filtrlarini muntazam tozalab turish tavsiya etilgan.