"Rayhon" milliy taomlar restorani egasi 8 yilga qamaldi
U Jinoyat kodeksining ikkita moddasi bo'yicha javobgarlikka tortilgan.
Namangan viloyati Pop tumanida ko‘rib chiqilgan jinoyat ishi bo‘yicha “Rayxon oilaviy milliy taomlari” ta’sischisi hamda yana olti nafar shaxsga nisbatan sud hukmi e’lon qilindi. Bu haqda Oliy sud matbuot kotibi Aziz Abidov ma'lum qildi.
Jinoyat ishlari bo‘yicha Pop tuman sudida 1977-yilda tug‘ilgan, avval sudlanmagan O. I. hamda yana olti nafar sudlanuvchiga oid jinoyat ishi ko‘rib chiqilgan.
Sud hukmiga ko‘ra, barcha 7 nafar sudlanuvchi Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 209-moddasi (mansab soxtakorligi), 227-moddasi (hujjatlar va boshqa rasmiy belgilarni noqonuniy egallash yoki yashirish) hamda 228-moddasi (hujjatlarni qalbakilashtirish va ulardan foydalanish) tegishli bandlarida nazarda tutilgan jinoyatlarni sodir etganlikda aybdor deb topilgan.
Sud hukmiga asosan, O. I. ga 8 yil muddatga ozodlikdan mahrum qilish jazosi tayinlandi. Jinoyat kodeksining 62-moddasiga muvofiq, qamoqda saqlangan muddati hisobga olinib, jazo muddati 7 yil 11 oy 28 kun etib belgilandi.
Qolgan olti nafar sudlanuvchiga ham sodir etgan jinoyatlarining og‘irligi va ishtiroki darajasidan kelib chiqib, turli muddatlarga ozodlikdan mahrum qilish jazolari tayinlandi.
Shuningdek, jinoyat ishi doirasida yetkazilgan moddiy zararni sudlanuvchilardan solidar tartibda undirish belgilandi.
Ma’lum qilinishicha, birinchi instansiya sudi hukmi ustidan qonunchilikda belgilangan tartib va muddatlarda Namangan viloyat sudining apellyatsiya yoki kassatsiya instansiyasiga shikoyat yoki protest keltirilishi mumkin.
