Endi ekologik ekspertiza boshqacha ishlaydi: Vazirlar Mahkamasining 2026-yil 11-maydagi 234-son qarori nimalarni o‘zgartirdi?
Yangi tartib loyihalarni ekologik xavfiga qarab baholash, byurokratiyani qisqartirish va xizmatlar shaffofligini oshirishni nazarda tutadi.
2026-yil 5-avgust kuni Ekologiya va iqlim o‘zgarishi milliy qo‘mitasi huzuridagi Davlat ekologik ekspertizasi markazi tomonidan Vazirlar Mahkamasining 2026-yil 11-maydagi 234-son qarorining mazmun-mohiyati va amaliy ahamiyatiga bag‘ishlangan matbuot anjumani bo‘lib o‘tdi.
Xo‘sh, yangi qaror bilan nimalar o‘zgardi?
Mazkur qaror asosida atrof-muhitga ta‘sirni baholash tizimi xalqaro standart va yondashuvlar asosida takomillashtirildi. Endilikda:
- loyihalar ekologik xavf darajasiga qarab toifalarga ajratilib baholanadi;
- skrining va skoping bosqichlari joriy etildi;
- uglerod izi hamda issiqxona gazlari emissiyasini baholash talabi belgilandi;
- jamoatchilik ishtiroki kengaytirildi;
- loyiha ishlab chiquvchilarning mas‘uliyati kuchaytirildi.
Shuningdek tadbirkorlar uchun bir nechta qulayliklar yaratilmoqda:
- ekologik ekspertiza xizmatlariga elektron murojaat qilish;
- loyiha toifasiga mos, mutanosib talablar asosida baholash;
- jarayonlarning yanada shaffof va tushunarli bo‘lishi;
- ochiq reyting tizimi orqali ishonchli loyiha ishlab chiquvchilarni tanlash imkoniyati;
- ortiqcha vaqt va xarajatlarning oldini olish.
Yangi tizimning asosiy maqsadi tadbirkorlar uchun qo‘shimcha cheklovlar yaratish emas, balki ekologik xavflarni oldindan baholash, byurokratik tartib-taomillarni soddalashtirish, davlat xizmatlarining shaffofligini oshirish hamda fuqarolar manfaatlarini himoya qilishdan iborat.
Vazirlar Mahkamasining 2026-yil 11-maydagi 234-son qarori O‘zbekistonda ekologik ekspertiza va atrof-muhitga ta‘sirni baholash tizimini zamonaviy bosqichga olib chiqishga xizmat qiladi. Mazkur islohot iqtisodiy rivojlanish va ekologik barqarorlik o‘rtasidagi muvozanatni mustahkamlashga qaratilgan.
Endi ekologik ekspertiza shunchaki ruxsat berish mexanizmi emas — u ekologik xavflarni oldindan boshqarishning zamonaviy tizimiga aylanmoqda.
