Damas’da 25 nafar bog‘cha bolasini olib ketayotgan haydovchi ushlandi
Haydovchi avval mast holda avtomobil boshqargani uchun sud qarori bilan haydovchilik huquqidan mahrum etilgani aniqlangan.
4-sentabr kuni Toshkent shahri Yashnobod tumanidagi Ohangaron ko‘chasida YPX inspektori tomonidan to‘xtatilgan Damas avtomobilida belgilangan me’yordan ortiq yo‘lovchi tashilayotgani aniqlandi. Bu haqda poytaxt IIBB xabar berdi.
Tekshiruv vaqtida avtomobil ichida 25 nafar bog‘cha bolasi bo‘lgani ma’lum bo‘lgan. Mazkur Damas esa atigi 7 nafar yo‘lovchiga mo‘ljallangan.
Haydovchining hujjatlari tekshirilganda, unda transport vositasini boshqarish huquqini beruvchi hujjat mavjud emasligi aniqlangan. Ma’lum bo‘lishicha, haydovchi avval mast holda transport vositasini boshqargani uchun sud qarori bilan haydovchilik huquqidan mahrum etilgan.
Haydovchi bolalarni xavf ostida qoldirgani uchun ularning ota-onalari va bog‘cha xodimlaridan uzr so‘ragan. U kelgusida tegishli hujjatlarni olib, qonun-qoidalarga rioya qilgan holda harakatlanishini bildirgan.
Transport vositasi vaqtincha saqlash uchun jarima maydoniga joylashtirilgan.
